OLATZ ZUGASTI

ELEAREN LAINOA

M: Olatz Zugasti. Ar: Mikel Fernandez L: Itxaro Borda.

​

Jagoitik basamortu horailak ditut desiratzen,
Itsasertz biluziak,
Karrika hutsak,

Eguzki hobengabeak kixkaili larruak, Irri partekatuak noiztenka
Eta denbora.

Ezer ez has, ez pentsa, ez erabaki, Ez mintza amodioaren aitortzeko ez bada...,

Elearen lainoa plazaren erditik Kezkaren sosegu agurka Hegaldatzen denean
Azkorriko zeru ubelegiek biltzen naute

Eta denborak.

Ezer ez has...

Lerratzen diren so auherrak

Ditut maite eta denboraren Bihozkada hunkituak:

Ezer ez has...

Ez mintza amodioaren aitortzeko ez bada,
Utz bizitzaren hautsak herioaren itsutzera

Eta ibili
Denboran bezala
Kanta baten hatzetarik oinik dukedano.

Ezer ez has...

​

ILUNDU BEGIAK

​

Ukamenak ilundu begientzat Jadanik
Ikustezinak bilakatuak gara: Nehork ez gaitu gurutzatzen Edo

Eta
Saihetsetik iragaiten zaizkigunean Ez digute agurrik luzatzen,
Ez bagina bezala. Egunerokotasunaren ausikia salbu, Maitalerik ez daukagu,
Eta tristura dorpeaz
Asetzen goaz;
Alabaina
Guziek badakite
Maitasunaren oinarrizko
Baldintza soakoetan
Bermatzen dela,
Eta ukamenak ilundu begientzat Dagoeneko
Ikustezinak bilakatuak gara.

​

GOIZEKO BORTZETAN

​

Banintu bi hegal
Joan nindaike berehala Zure leiho hegira Kantuz agurtzera.

Kanpoan euria dugu Entzuten ote duzu
Ni ere euri banintz Joan nindaike berehala

Zure teila hegira Kantuz agurtzera. Nere hedoitik Goizeko bortzetan.

​

OINEZ

​

Garapen iragarriaren sareetan Lekurik ez dugunok
Hargatik,
Oinez

Jarraituko dugu,
Desertu idorretan
Zango-zola lardaskatuak Orbaindu arte.
Zure eskua, zure soa,
Zure ezpainen plegu minbera Gidari xume bekizkit, Pentsamendu doieko
Argizpi kuttun,
Are urrunago eraman dezagun Garapen iragarriaren sareetarik Kanpo daramagun
Ibilbide
Itxuratzailea.
Desertu idorretako
Errautsek
Betazalak, biloak, soinak Lurrez

Estaliko dizkigutelarik Salbatunean, Noizbait
Ez ote gara

Elkar ezagutuko?

​

ZENBAT GAU

​

Zenbat gau, zenbat egun, Zure bakardadean!
Bete ezin diren aginduen Argilunetan, noraezean.

Ahula dago nere gogoa... Partekatu ele, irri, malkoak Errainu izpi beroa nola Lanbro itsuen urtaroan.

Zure galderek enbarazu egiten ziguten
Bide leunetan joan nahi genuenoi Erantzunik behar ez den leku bat Aurkitu zenuen,

Erantzunik behar ez den leku bat Non zure jakin mina itotzen zen.

Haurra zinen, hamabi edo hamahiru Legeen isilpeko atean barna Oharkabean sartu zinenean
Urteak joan dira

Lausotu galderak.
Ihes egitea bilakatu zen Zure zeregin bakarra.

​

HATSA GAI ARTINO

​

Bortu-aska hertsi hartan
Aspaldiko partez
Seguru sentitzen da,
Uholde iragarritik salbaturik bezala. Laster egin dezake laster

Aire hotzak birikak
Labaintzen dizkiola,
Hatsa gal artino,
Laster.
Mendi-bizkarretan gora datozen Erdeinu-mehatxuetarik

Ihes abia daiteke,
Aitak, senarrak, nausiak ohoratzen Dituen jendartetik
Ihes,
Funtsezko askatasun gisa Laudatuak diren ukamen
Eta menpekotasunetarik
Ihes,
Joan baledi,
Aurki lezakea lurrutsetara Laguntzeko untzirik portuan?
Badea basamortu aski handirik
Ihes zilegiaren gerizatzeko?
Ala norberak bihotzaren sakonean Darama bilatzekoa duen Basamortua?
Bihurguneko haltzaren maldara amoltsuki
Erortzen dira euri-berriaren
Malko etsituak:
Oroitzen da maite duela eta ez diola Oraino deus erran.